სიახლეები

სოფლის კრება კოშკში

29.02.2016

29 თებერვალს სოფლის განვითარების პროგრამის ფარგლებში სოფელ კოშკში ჩატარდა სოფლის კრება. კრებას ესწრებოდნენ გორის მუნიციპალიტეტის გამგებელი დ. ონიაშვილი და გამგეობის წევრები, სოფლის მოსახლეობა, 30 ადამიანი, ასევე სოფელ მერეთის რწმუნებული და დეპუტატი.

წელს სოფლის განვითარების პროგრამის ფარგლებში სოფელ კოშკისთვის გამოყოფილია 9050 ლარი. მოსახლეობამ გამგებელთან შეხვედრისას ბევრი სხვადასხვა პრობლემა დაასახელა, როგორიცაა, სოფელ კოშკში სარწყავი წყლის არქონა, ექიმის არყოლა, გზის არარსებობა, ნაგვის ბუნკერების არქონა და სხვა. საზოგადოებას სურდა კოშკში სოფლის განვითარების პროგრამის ფარგლებში მომხდარიყო ძველი ბიბლიოთეკის შენობის გარემონტება, რისთვისაც საჭირო მასალები წინა წლებში იყო ნაყიდი. თუმცა სოფლის რწმუნებული და გამგებელი მოსახლეობას დაჰპირდნენ, რომ აღნიშნული შენობა გარემონტდება სხვა პროგრამის ფარგლებში, ხოლო სოფლის განვითარების პროგრამიდან უმჯობესი იქნებოდა სოფელში შიდა გზების მოხრეშვა და გარე განათების დასრულება. სამწუხაროდ, მოსახლეობა არ აღმოჩნდა მზად დაეცვა საკუთარი პოზიცია, გარდა ამისა, ყველა პრობლემის ერთდროულად გადაჭრა სურდათ. საბოლოოდ რწმუნებულმა გადაწყვიტა შიდა გზების მოხრეშვა და განათება დასრულებულიყო.

აღსანიშნავია, რომ შეხვედრაზე არ შემდგარა კრების ოქმი, ასევე კრებაზე დასწრებაზე არ მოუწერია ხელი არც ერთ მოსახლეს. ყველა დაპირება გაცემულია ზეპირად. გამგეობის წარმომადგენლების თქმით, სოფლის განვითარების პროგრამის ფარგლებში მუშაობა, სავარაუდოდ, მაისის შუა რიცხვებიდან დაიწყება, ამისათვის გამოცხადდება ტენდერი და, სამწუხაროდ, სამუშაოების შესრულებისას, როგორც ჩანს, ადგილობრივი მაცხოვრებლები კვლავ არ იქნებიან დასაქმებულნი.

 

ასოციაციის თანამშრომლები დაპირებების შესრულებაზე რეგულარულ მონიტორინგს გააკეთებენ და ინფორმაცია დაიდება ასოციაციის ვებ-გვერდზე და საინფორმაციო-საკომუნიკაციო პლატფორმის ფეისბუკის გვერდზე.

Share on Facebook
Share on Twitter
Please reload

  • თანხმობა
  • თანხმობა
  • თანხმობა

© 2020 იძულებით გადაადგილებულ ქალთა ასოციაცია "თანხმობა"